Psa 36 | YON | STEP | Yook ambo bi ye karub yeman. Yariman ye dememan Dewidbed wongkoon. God yaambed weng kuu ne niindem aom meneboon, arewa kamidan yi ambarakmenabi ye dowad, kedi yi inamen aom kuu God yaa unimokban.

Psalms 36

Yook 36

Yook ambo bi ye karub yeman.Yariman ye dememan Dewidbed wongkoon.

1 God yaambed weng kuu ne niindem aom meneboon, arewa kamidan yi ambarakmenabi ye dowad,
kedi yi inamen aom kuu God yaa unimokban.
2 Amborom kuu ambarakmimbed “Eb kuu karub amun.” andaane yeka ye indob arimbed kerengkan kamimaan kowe,
ye ambarakmi ma wedmindo, kuyaa kongenindo.
3 Ye mongkodkonombed dakmimaan ye weng kuu yena yaa bon kerundi ye weng angkon dudanabi weng,
kwane ye kuu inamen kangdomiib kami amuniib yaa korondoon dowan.
4 Ye angkimbon arak ari angkimaan kwangkon yena yaa bon kerundi ye inamen kowimaan,
kwane “Arewa kami ye kiwaan ari dobara.” ande kwanimaan,
kwane ye kuu inamen arewa yaa kangkadmimokban.
5 OYariman, eb womoniyiibban ye mimyob dowaken ye ambab kuu daane ewen ari nandoon,
kwane eb ma korondiyiibban eweng awini ye ambab kuu daane ambid ari nandoon.
6 Eb yorokmo kerekmen kuu aromkono darewoob ye aangko areb,
kwane eb wengyundi kuu karamok ye niindem ambab yiri areb.
OYariman, nimakaruwiib dingkaniib oonendimaab.

7 O God, eb womoniyiibban ye mimyob dowaken kuu miin manimanandeb anam!
Nimakarub kuu eb buraab ye kubun kurumbon areb ebbed kukbimaabbon aombed doriib.
8 Yi kuu ewambiwoom animan yiminmo kumbed orok animaib,
kwane ebbed yi yaa kubembirimaab ye ok awaan yaambed ok kondimaab.
9 Amborom kuu eb yaambed wadkeri ye ambokab ye ok meneboon,
kwane eb nambiri yuroon kumbed wad dobere wedmuub.
10 Eb womoniyiibban ye mimyob dowaken kuu kane kane eb yaa yikaadkeriwendan kuyaa kwane kondembere.
Kwane eb inamen yorokmo kuu kane kane niindem aom kangdommo doriibdan kuyaa bangkandembere.
11 Kerengkandan kuu ne yaa mene bon keruwaib,
kwane arewa kamidan kuu ne yaa nangmaiwe kombiri wanain.
12 Wedmime, arewa kamidan kuu yiri kirobe dangiwen,
yi kuu ben yiri kiraroone ika dembindeban keriwen.